Halos P200 milyunes nga kantidad sa gidudahang shabu ang nasakmit sa kapulisan sa Mandaue City gikan sa Enero 1 hangtod Agusto 10, 2025.
Kini base sa datos gikan sa Mandaue City Police Office (MCPO).
Base sa mga numero, ang MCPO nihimo og 1,036 ka anti-drug operations sulod niining panahona.
Nasakmit nila ang 28,815.15 gramos sa gidudahang shabu, nga adunay gibanabana nga street value nga P195,947,028.
Sa maong mga operasyon, nasikop ang 1,044 ka mga tawo.
Usa sa pinakabag-o ug dako nga operasyon nahitabo niadtong Agusto 9 sa Sitio Uniwide, Barangay Tipolo, diin nasikop sa mga operatiba ang usa ka giingong drug courier sa buy-bust.
Nakuha gikan sa dinakpan ang gibanabana nga P17 milyunes nga kantidad sa gidudahang shabu.
Niadtong Agusto 1, nakuha sa mga polis ang pinakadako nga dakop sa tuig didto sa Mantawi Drive sa Barangay Subangdaku.
Nasakmit sa kapulisan ang upat ka kilo sa gidudahang shabu nga nagkantidad og P27.2 milyon.
Kini nga high-impact nga operasyon gituohang nakabalda sa usa ka dakong supply channel.
Gipasabot ni MCPO spokesperson Lt. Col. Mercy Villaro nga ang location sa Mandaue maoy rason nganong nahimo kini nga target sa mga drug trafficker.
Gipadayag niya nga ang MCPO nakig-alayon sa ubang mga operating unit aron masubay ang daghang mga drug personalities, nga pipila kanila anaa na sa surveillance.
Giklaro ni Villaro nga daghan sa mga nasakmit nga drugas wa maggikan sa Mandaue apan gipaagi lamang sa siyudad isip kabahin sa mas dako nga rehiyonal o nasyonal nga distribution networks.
Gawas sa shabu, nakasakmit usab ang MCPO og marijuana sa laing mga operasyon, nga nagkantidad og P1,560. / CAV