Mga binulto sa gituohang shabu nga mobaot sa P4,522,000 ang nasakmit sa kapulisan sa Cebu City Police Office (CCPO) atol sa duha ka managlahing anti-drug operations nga kabahin sa simultaneous anti-criminality and law enforcement operation (Sacleo) sa PNP niadtong Sabado, Enero 27, 2024.
Unang operasyon gilusad sa mga sakop sa Abellana Police Station 2 nga nahitabo sa Sitio Lower Kawayan, Barangay Sambag 2, dakbayan sa Sugbo nga niresulta sa pagkasikop sa high value individual (HVI) nga si Jeffrey Robin Pabalate alyas Jomboy, hamtong, taga Belgium St., Barangay Suba.
Ang kapulisan sa Police Station 2 sa pagpangulo ni Police Captain Mark Don Alfred Leanza nihimo sa maong anti-drug operation ug nakuha ang mga dagkong putos sa gituohang shabu nga dunay gibug-aton nga 500 gramos nga dunay standard drug price nga P3.4 milyunes.
Lakip sa nakuha ang buy-bust money nga P59,000 nga boodle money ug usa ka P1,000 nga tinuod nga kwarta nga maoy gigamit sa pagpalit sa illegal nga drugas.
Pagka Dominggo sa buntag, Enero 28, 2024, laing duha ka giila nga HVI ang nasikop sa mga operatiba sa City Drug Enforcement Unit sa CCPO sa Barangay Guadalupe.
Ang mga suspetsado giila nga silang Reneboy Maloloy-on Remorosa alyas Sarko, 36, taga Sitio Manggahon, Barangay Guadalupe; ug Britz Patigayon Geraldizo alyas Jiji, 33, lumad nga taga Dipolog City, Zamboanga Del Norte apan kasamtangan nga nagpuyo sa Sitio Tangkungan, Barangay Basak Pardo.
Nakuha gikan kanila ang 165 gramos sa gituohang shabu nga dunay standard drug price nga P1,122,000.
Ang mga suspetsado kasamtangan nga gipangbutang sa temporary custodial facility sa CCPO ug gipaubos sa imbestigasyon kon asa sila magkuhaan sa ilang supply sa illegal nga drugas.