Nalandig sa tambalanan ang drayber sa dump truck nga nahug sa pangpang ug ang laing drayber ug truck boy sa Fuso Aluminum Van nga nadasmagan.
Ang aksidente nahitabo alas 5 sa hapon sa Lunes, Hunyo 3, sa may national highway sa Brgy. Uling, siyudad sa Naga, habagatang Sugbo. Ang unang naangol mao ang drayber sa 10-wheeler truck nga si Sodili Fernandez Noble, 34, minyo, taga Uling, dakbayan sa Naga.
Samtang ang laing nangaangol mao sila si Francisco Siason Dumos-og Jr., 43, minyo, taga-Pakigne, Minglanilla, drayber sa van ug ang iyang truck boy nga si Noel Santarita, 36, minyo, taga Sibonga.
Sa imbestigasyon sa kapulisan sa City of Naga Police Station ubos sa kamanduan sa ilang hepe nga si P/Lt. Col. William Homoc, nasayran sa Superbalita Cebu nga ang dumptruck gikan sa Sityo Apid, Uling padung sa Pangdan, Naga, samtang ang van gikan sa Siyudad sa Toledo ug padulong sa siyudad sa Sugbo.
Apan matod pa, pag-abot sa dapit nga nahitaboan nawad-an og brake ang dumptruck hinungdan nga nikawas kini sa lane nga iyang gisubayan hinungdan nga naigo ang van samtang ang dump truck nahulog sa pangpang. / DVG