Nakasinati og mga 12 ka oras nga blackout ang pipila ka mga barangay sa siyudad sa Lapu-Lapu human nasabod sa linya sa kuryente ang dumpbox sa usa ka trak sa ala 1:30 sa kaadlawon sa Sabado, Enero 27, 2024.
Sa hitabo, matod sa Mactan Electric Company (Meco), tulo ka mga poste sa Dalan MV Patalinghug sa Brgy. Basak ang nakaangkon og kadaut.
Base sa imbestigasyon ni Police Staff Sgt. Emmanuel Blomes, investigator on case sa Lapu-Lapu City Police Office Station 3,ang trak nga gimaneho ni Julito Yanggo Duterte, 61, minyo, taga Quisol, Siyudad sa Danao, niyabo og yuta sa maong dapit.
Pagkahuman, niabante kini nga wa gipaubos ang dump box hinungdan nga nasangit ug naharos ang mga linya sa kuryente ug poste.
Base sa Facebook post ni Nagiel Bañacia, pangulo sa Lapu-Lapu City Disaster Risk Reduction and Management Office (CDRRMO), ang nangaigo sa blackout mao ang Barangays Gun-ob, Babag, Poblacion, Pajo, Looc, Canjulao, Kalawisan ug Babag. Sa post sa Meco, ilang nabalik ang kuryente mga ala 1:10 sa hapon sa Sabado.