Gidili ang pagkaon sa mga kinhason nga gikan sa kadagatan sa lungsod sa Madridejos sa isla sa Bantayan, amihanan sa lalawigan sa Sugbo.
Nanawagan ang Agriculture office sa maong lungsod sa publiko nga likayan una ang pagkaon og mga shellfish o kinhason ug Alamang gikan sa kadagatan sa lungsod human nagpositibo sa red tide ang katubigan niini.
Ang maong resulta gikompirmar ubos sa laboratory test sa Bureau of Fisheries and Aquatic Resources (BFAR 7).
Matod sa BFAR 7, ang red tide mosiaw tungod sa pagdagsang sa talagsaong matang sa algae nga makahilo ug kon dunay kalit nga pag-usab sa panahon, gikan sa grabeng kainit ngadto sa pag-ulan.
Tungod niini, ang tanang klase sa shellfish ug Acetes o alamang ilabi na ang talaba, scallops, litob, tahong, halaan nga makuha gikan sa nahisgutang dapit, dili luwas kaunon.
Lakip sa epekto sa kontaminadong mga kinhason ang gitawag og Paralytic Shellfish Poisoning (PSP) o ang pagkahilo, pagka paralyse, paglabad sa ulo, pagsuka, paglisod og tulon, paglisod sa pag-istorya, pagkaluya ug moresulta usab sa pagkamatay.
Hinuon, luwas gihapon kaunon ang isda, lambay, nukos ug pasayan basta malimpyuhan lang kini ug maluto og insakto.
Nanghinaot ang kagamhanan nga mosunod ang tanan sa maong lagda aron kalikayan ang disgrasya.