Nagbitbit sa iyang dunggan nga ni-report sa kapulisan kining street vendor human kini naputol kay gipaak sa iyang ig-agaw nga vendor Lunes sa hapon, Marso 10, 2025, sa Sitio Puntod Alaska, Barangay Mambaling, Dakbayan sa Sugbo.
Ang biktima nga si Boy Pagasan, 32, minyo, usa ka Badjao nga nagpuyo sa Sitio Puntod, gidala sa Cebu City Medical Center human sa hitabo.
Ang 31 anyos nga suspek nga usa usab ka Badjao nga si Jomaani Jamare Caballi, minyo, gipusasan sa kapulisan.
Ang biktima nangayo'g panabang sa kapulisan sa Mambaling alas 8:30 sa gabii sa Lunes dala ang iyang putol nga dunggan nga giputos og cellophane.
Daling niresponde ang mga polis sa alas 8:30 sa gabii sa Lunes og ilang napusasan ang suspek.
Si Caballi nga nahinabi sa Superbalita Cebu, niangkon sa iyang nabuhat.
Matod pa niini nga nag-away sila sa iyang ig-agaw tungod sa ilang mga anak.
Sumala niya nga ang iyang anak nga batang lalaki kanunay nga bullyhon sa anak sa biktima, hinungdan nga dili na ganahang moeskwela unya inig pauli maghilak.
Dugang niya nga sa ikatulong higayon nga gi-bully ang iyang anak maong iyang giadto ang inahan sa bata nga ipabadlong ilang anak nga dili na mang-bully. Apan nasuko ang inahan ug sila nagkalalis.
Atol sa konprontasi, nilaban ang bana nga iyang ig-agaw hangtod nga nagkasinumbagay sila apan nalupig siya hinungdan nga iyang gipaak ang dunggan sa bana.
“Lupig man ko niya kay dako unya maayong manumbag! Naluya na pud ko sinumbag, nangitom ako panan-aw ako gipaak iyang dunggan,” matod ni Caballi.
Gipadayag niini nga daw nasudlan siyag demonyo tungod sa iyang kalagot.
Nagmahay siya sa iyang nahimo nga krimen.
Nangayo siya og pasaylo sa biktima sanglit naa siyay lima ka gagmay nga bata.
Nipasalig siya nga motabang sa galastuhan sa pagpatambal sa biktima. / GPL