Nanawagan si Acting Mayor Donaldo Hontiveros sa publiko nga itugyan ang mga gisi o daan nang bandila sa Pilipinas ngadto sa Cultural and Historical Affairs Commission (Chac) sa Dakbayan sa Sugbo aron sa tukmang paghipos niini.
Kini subay sa higpit nga pagpatuman sa Republic Act 8491, o nailhan usab isip Flag and Heraldic Code of the Philippines.
Sa usa ka interbyu niadtong Lunes, Hunyo 9, 2025, si Hontiveros nga maoy tsirman sa Chac, nipahinumdom sa katawhan nga ang mga guba o nagkagisi nga bandila dili gyud angay nga ilabay lang.
Kinahanglan kining ipailawom sa usa ka solemne nga seremonya sa pagsunog aron malikayan ang bisan unsang matang sa pagpasipala, sumala sa gimando sa Seksyon 14 sa balaod.
Matod niya nga ang mga bandila nga nagpakita og mga timailhan sa pagkadaot kinahanglan dayon nga pulihan.
Usa ka solemne nga seremonya sa pagsunog sa mga dunot na nga bandila gitakda sa Martes, Hunyo 10, sa Cebu City National Science High School sa Labangon sa alas 4:30 sa hapon.
Gipadad-an ni Hontiveros og imbitasyon si Mayor-elect Nestor Archival nga moapil sa importanteng kalihukan.
Sa dili pa ang ika-126 nga pagsaulog sa Independence Day, gipahibalo sab ni Hontiveros ang usa ka civic parade nga gikatakda sa Huwebes, Hunyo 12.
Ang parada magsugod gikan sa Plaza Independencia ug molahos sa Plaza Sugbu, sundan sa usa ka Holy Mass sa alas 7 sa buntag.
Agi og paghandom sa Independence Day, gipasabot ni Hontiveros ang kaimportante sa paghinumdom sa mga sakripisyo nga gihimo niadtong maisugong nakig-away alang sa kagawasan sa nasod.
“Dali ra man gud makalimtan ang gibuhat sa tawo, even as a councilor dali ra makalimtan. Much more unsa na’y nabuhat sa atong mga heroes who really fought for our independence,” matod niya.
Gidasig niya ang hiniusang paningkamot sa pagpreserbar sa kabilin sa kabayanihan.
“Hopefully in our own way, naa sad tay pagabuhaton. Gamay lang gyud siya, but kon magkadaghan man gud, it will create a ripple effect,” dugang ni Hontiveros.
Gitumbok niya ang gihimo sa konseho paggamit sa personal nga mga tumbler atol sa mga sesyon isip usa ka gamay apan epektibo nga panig-ingnan, usa ka praktis nga karon giawhag ni Archival alang sa mga miting sa department head.
Sa dihang gipangutana unsay iyang mensahe ngadto sa mga estudyante nga mobalik sa klase sunod semana, matod ni Hontiveros nga hatagan og bili sa paghinumdom ang mga bayani ug sa mga prinsipyo nga ilang gipakig-awayan.
“We are hoping, dako kaayo ta og ihatag nga responsibilities sa ilaha kay next generation leaders,” panapos niya nga gipasiugda ang papel sa kabatan-onan karon isip mga lider sa umaabot. / JPS