PORMAL nga gikumpirmar sa Sangguniang Panlalawigan ang pagtudlo ni Atty. Joseph Felix Mari “Ace” Durano isip Provincial Administrator ug Atty. Guiller Ceniza isip Provincial Legal Office sa Probinsiya sa Sugbo atol sa regular session sa Lunes, Hulyo 21, 2025.
Si Durano nigraduwar isip abogado sa Ateneo de Manila - School of Law.
Sa wala pa nahimong Secretary sa Department of Tourism (DOT) sa administrasyon ni kanhi Presidente Gloria Macapagal Arroyo, nagsilbi usab siya isip kongresista sa kinto distrito.
Samtang si Guiller graduwado usab sa kursong Bachelor of Science in Commerce major in Accounting sa University of San Carlos ug nigraduwar usab sa iyang Law studies sa samang unibersidad.
Usa siya ka Certified Public Accountant ug abogado nga nagsilbi isip accountant sa Cebu Technological University (CTU) ug nahimong legal officer sa Cebu City government.
Si Durano nipasabot nga klaro alang kaniya ang iyang katungdanan nga mahimong matumong ang tanan nga lakang sa probinsiya sa mga programa sa gobernador.
“And my task is quite clear and thats just to implement the priorities of the governor. And to work according to the leadership style of the governor and which is to collaborate. I look forward to collaborating this chamber on behalf of the governor,” matod ni Durano sa Hulyo 21, 2025.
Samtang si Guiller nipasalig usab nga makigtambayayong sa hunta probinsyal ug sa mga bokal ilabi na sa mga komitiba niini nga nagkinahanglan sa abag sa legal nga bahin.
Ang duha ka mga tinudlo giubanan usab ni Cebu Governor Pamela Baricuatro sa maong higayon. / ANV