Mapun-an ang pwersa sa Houston Rockets sa ilang pagkuha sa 15-time All-Star forward Kevin Durant gikan sa Phoenix Suns, matod sa taho sa NBA insider.
Baylo kang Durant sa maong trade mao ang guard nga si Jalen Green, forward Dillon Brooks, ang No. 10 overall pick sa 2025 NBA Draft, ug lima ka second-round picks.
Ang trade mahimong opisyal karong Hulyo 6, 2025. Sa maong petsa, mahimong kwalipikado si Durant sa pagpirma og duha ka tuig nga extension nga nagkantidad og $122 milyunes.
Usa na lang ka season ang nabilin sa kontrata ni Durant diin siya gikatakdang makadawat og $54.7 milyunes sa 2025–26 season.
Mosulod si Durant sa usa ka Rockets team nga nakatapos sa regular season isip No. 2 seed sa Western Conference. Kauban niya sila si Alperen Sengun, Amen Thompson, ug Fred VanVleet.
Niadtong 2024–25 season, niduwa si Durant og 62 ka duwa sa Suns diin nag-average siya og 26.6 puntos, 6.0 rebounds, 4.2 assists, ug 1.2 blocks.
Ang 36-anyos nga si Durant napili nga All-NBA First Team kaunom ka higayon ug nakaduwa na og 1,123 games sa iyang NBA career sukad nasulod sa liga sa Seattle/Oklahoma City Thunder (2007–2016), Golden State Warriors (2016–2019), Brooklyn Nets (2020–2023), ug Phoenix Suns.
Ang iyang career average mao ang 27.2 ka puntos, 7.0 ka rebounds, 4.4 ka assists, ug 1.1 ka blocks matag duwa. / RSC