Midugang og sports investment ang NBA icon nga si Kevin Durant human kini mopalit og minority ownership stake sa French football powerhouse nga Paris Saint-Germain (PSG).
Ang investment gihimo pinaagi sa kompanya ni Durant nga 35V, kauban ang Qatar Sports Investments (QSI) — ang tag-iya sa PSG. Ang partnership nahimo pinaagi sa strategic deal nga naglatid sa long-term collaboration sa duha ka grupo. Wala pa gipadayag ang eksaktong kantidad sa transaksyon.
Sumala sa PSG, kini nga lakang kabahin sa ilang plano nga mapalapdan pa ang ilang brand sa ubang disiplina sa sports, lakip na ang basketball. Si Durant, nga usa sa mga pinakadako’g pangalan sa NBA, gitagad isip importante nga partner tungod sa iyang global influence ug kasinatian sa sports entrepreneurship.
Kini ang pinakabag-ong investment ni Durant gawas sa NBA, pagkahuman na niya og pag-apil sa ownership sa MLS team nga Philadelphia Union ug uban pang ventures sa sports media ug tech. / RSC