‘Durugista’ sa Carcar sa Duljo ‘tigkuhaan’

‘Durugista’ sa Carcar sa Duljo ‘tigkuhaan’
SunStar Local News GPX

Giila nga High Value Individual (HVI) sa kapulisan nasikop atol sa gilusad nga buy-bust sa mga sakop sa PNP Drug Enforcement Group- Special Operation Unit 7 sa G. Gaisano Street, Barangay Tejero,dakbayan sa Sugbo alas 6:16 sa Biyernes sa gabii, Mayo 3, 2024.

Ang suspek giila nga si John Rae Tapere, 32, way trabaho, taga Katugasan, Perrelos, Carcar City.

Nakuha gikan kaniya ang siyam ka putos sa gituohang shabu nga motimbang og 100 gramos nga dunay standard drug price nga P680,000.

Tulo ka semana nga gipaubos sa surveillance si Tapere human nakadawat og impormasyon ang PNP DEG-SOU-7 labot sa ilegal nga kalihukan niini.

Sigun sa gitug-an ni Tapere sa kapulisan nga sa Barangay Duljo Fatima siya magkuhaan sa iyang supply sa ilegal nga drugas sa usa ka drug personality nga maoy sunod target sa anti-illegal drug operation.

Giingong makabaligya siya og usa ka kilo nga gituohang shabu matag buwan.

Kasagaran sa iyang area nga baligyaan sa iyang supply mao ang dakbayan sa Carcar ug silingang mga lungsod sa lalawigan sa Sugbo.

MARIJUANA PLANTATION

Samtang gironda usab sa PNP Drug Enforcement Group- Special Operation Unit 7 ang usa ka marijuana plantation nga nahimutang sa Sitio Kalugtugan, Barangay Pangamihan ug Sitio Himatugan, Barangay General Climaco, dakbayan sa Toledo niadtong Huwebes sa alas 4:25 sa hapon Mayo 2, 2024 nga niresulta sa pagkaibot sa balor P3.9 million nga punoan sa marijuana.

Sa Sitio Kalugtugan, Barangay Pangamihan naibot ang 10,500 ka fully-grown nga punoan sa marijuana nga mobalor og P2.1 milyunes nga gitanom sa gibana-banang 2,500 square meters nga luna, lakip na ang 500 ka seedlings nga mokantidad og P20,000.

Samtang sa Sitio Himatugan, Barangay General Climaco, nakasakmit usab og tulo ka kilo nga liso sa marijuana nga dunay standard drug price nga P75,000, lakip na ang 15 kilos nga uga na nga punoan ug dahon sa marijuana nga mokantidad og P1.8 milyunes.

Ang maong mga punoan sa marijuana gisunog sa dapit samtang ang gitamnan niini gi-sprayhan og herbicide aron dili na makatubo pa.

Walay nadakpan nga tawo sa duha ka luna sa marijuana plantation kay way nihatag kanila og impormasyon. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph