Kasamtangang nag-trending sa nagkadaiyang social media platforms ang potensyal nga charity boxing match tali nila ni Philippine National Police (PNP) chief Gen. Nicolas Torre III ug Davao City acting mayor Sebastian “Baste” Duterte.
Dili ikasurpresa nga naabot kini sa kasayuran ni Cebu boxing promoter Lorenzo “Chao” Sy bisan kasamtangan kining naa sa Amerika sa personal nga rason.
Sa iyang pagpakighinabi sa Superbalita Cebu ning Huwebes, Hulyo 24, 2025, sa messenger, nagkanayon si Sy nga ang premiro niyang reaksyon human niya nasayran ang kabahin ning maong isyu – dili siya motuo.
“Dili na tinud-anay ang ilaha. Ilaha ra nang gibuhat para sa ilang supporters,” matod ni Sy.
Hinuon giklaro ni Sy nga kon tinud-anay man gani, andam siyang mo-promote sa away dinhi sa Dakbayan sa Sugbo.
“Pero dili na madayon. Dako kaayo si Baste unya kagamay ni Torre,” pasabot ni Sy.
Kon madayon man gani ang away, silingan na sab sa imposible nga mahitabo ang intensyon ni Sy nga ma-promote kini sa Sugbo gumikan kay gawas sa kahagip-ot sa panahon, gikataho nga naka-set up na sab si Torre og boxing ring sa Rizal Memorial Coliseum (RMC) sa Manila alang sa gikahinamang away.
Sa interbyu sa SunStar Philippines, nagkanayon si Torre nga maghuwat siya ni Duterte sa RMC karong Dominggo, Hulyo 27, 2025, sa alas 9:00 sa buntag, alang sa binukbokay nila ni Duterte.
Gusto unta ni Torre nga sa Araneta Coliseum ipahigayon ang away apan aduna nay mas naunang naka-eskedyul sa makasaysayong venue.
Gipahibalo sab ni Torre nga aduna na’y mga ningpadayag nga andam mo-sponsor sa away ug adunay hugonhugon nga usa niini si Cebu boxing legend Manny Pacquiao.
“Whether he shows up or not may mga sponsors na nagsabi na magdo-donate sila nang pang-ayuda sa ating mga kababayan na nasalanta ng bagyo at baha,” matod pa ni Torre, kinsa nag-training na alang sa away.
Nagsugod kining maong isyu tungod sa paghagit ni Duterte kang Torre niadtong Dominggo, Hulyo 20, nga gipaagi sa iyang “Basta Dabawenyo” vlog,
“Kasi matapang ka lang naman you have the position. Pero kung suntokan tayo alam kong makaya kita. But then you’re a coward,” mahagitong pamahayag ni Duterte kang Torre.
Ang hagit ni Duterte gidawat sab dayon ni Torre.
“Ang una kong naisip, tamang-tama. Maraming kababayan natin ngayon ang nangangailangan ng tulong na naapektuhan ng bagyo at baha. Maybe, this is a very good time para sa isang charity boxing match,” asoy ni Torre. / ESL