Dyip mobangga sa uhaw nga Gin Kings

Dyip mobangga sa uhaw nga Gin Kings
Basketball (File Photo)

Mga duwa karon

3:00 P.M Meralco Bolts

vs. TNT Tropang Giga

6:15 P.M Terrafirma Dyip

vs. Brgy. Ginebra San Miguel

Duha ka teams nga nagtingu­ha makabangon gikan sa ka­pildihan, ang Terrafirma Dyip ug Barangay Ginebra Gin Kings, magharong sa main game sa Philippine Basketball Association (PBA) Philippine Cup 2024 karong Dominggo sa gabii, Abril 7, 2024, sa Ninoy Aquino Stadium, Maynila.

Kadaugan ang naa sa huna-huna karon sa Gin Kings human sila gihubog sa sister team, ang league-leading San Miguel Beermen, 92-95, niadtong Biyernes sa Smart Araneta Coliseum.

Ang heart-breaking layup ni Beermen guard Jericho Cruz sa 44 segundos nga nahabilin sa fourth quarter hingpit nga ni­silyo sa istorya sa maong duwa.

Nisaka ang Beermen sa ibabaw sa team standings dala ang perpekto nga 4-0 (win-loss) record samtang ang Gin Kings nalipong ug natagak sa ikalima nga pwesto bitbit ang 3-2 nga kartada.

Magsalig ang Gin Kings nila ni Japeth Aguilar, Scottie Thompson, Maverick Ahanmisi, Stanley Pringle, Jamie Malonzo ug Christian Standhardinger sa ilang pakigbagat sa Dyip.

Ang Dyip, sa laing bahin, nag­ti­nguha nga makabalik og pakusog sa dagan human sila na­hub­san og gasolina batok Meralco Bolts, 83-86, sa miaging Miyerkules sa Smart Araneta Coliseum.

Ang Meralco shooter nga si Bong Quinto maoy nipahubas sa Dyip gamit ang pito ka sunodsunod nga puntos aron balihon ang 79-81 nga deficit ngadto sa kadaugan.

Sa ilang pagkigkombati sa Gin Kings, dalhon nga pambato sa Dyip sila si Juan Miguel Tiongson, Stephen Jeffrey Holt, Javier Gomez de Liano, Aldrech Ramos, Mark Louie Sangalang ug Kevin Ferrer. Naa sa ikapito sa team standings ang Dyip dala ang 3-3 nga rekord.

Samtang sa first game karong Dominggo, mag-abot ang Meralco Bolts (3-3) ug TNT Tropang Giga (2-3). Saligan sa Bolts sila si Quinto, Chris Newsome, Ray­mond Almazan, Norbert Tor­res, Chris Banchero, Aaron Black, Allein Maliksi ug Cliff Hodge.

Ang Tropang Giga gustong mobangon human nawagtangan og signal kontra Northport Batang Pier, 96-112, niadtong Biyernes.

Maglaum ang TNT sa maayong performance ni nila RR Pogoy, Jason Castro, Calvin John Oftana, Brandon Arnell Ganuelas-Rosser ug Henry Galinato.

Niining pagsuwat, nagkinawrasay ang NLEX Road Warriors (4-1) kontra Magnolia Chicken Timplados Hotshots (1-1). / RSC

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph