Gidakop ang usa ka e-bike driver nga nag-wild tungod sa kahubog ug nanghagad og duwelo sa mga tanod alas 10:05 sa gabii Huwebes June 3, 2025 sa Cabreros St., Barangay, Basak San Nicolas, Dakbayan sa Sugbo.
Si Junmar Flores Jr., 22, dunay kapuyo, nagpuyo sa nahisgutang lugar gitanggong sa Mambaling Police Station samtang mag-atubang sa kasong alarm and scandal. Ang suspek nagmaoy dihang gialarmahan kay gihagad niya ang mga tanod og duwelo.
Si Junmar, nga nahinabi sa Superbalita Cebu nanghimakak sa mga pasangil batok kaniya. Nangatarungan kini nga igo ra siyang nitabang sa iyang pag-umangkon nga gikulata.
Dunay silingan nga nagpahibalo kaniya nga iyang 13 anyos nga pag-umangkon gikulata sa mga batan-on. Nagmaneho sa e-bike iyang pag-umangkon ug giingong gitripingan. Nagdali siya sa paggawas ug giatubang ang mga batan-on apan gikalitan siya og sumbag.
Wa na siya makabawos kay gitabangan siyag kupot ug siya na hinuon ang nabun-og. Nipasangil kini nga sa pag-abot sa mga tanod gibunalan sa tubo iyang nawong. / GPL