Nalandig sa prisohan ang usa ka e-bike driver nga gituohang tiggamitan og ilegal nga drugas human gireklamo sa iyang igsuon’g babaye nga nangulata kaniya niadtong Sabado, Mayo 17, 2025, sa may Sitio Viking, Barangay Mambaling, Siyudad sa Sugbo.
Ang suspek nailhan nga si alyas Albert, 31, ulitawo, samtang ang biktima nga iyang manghod mao si alyas Angel, 23.
Ang live-in partner sa biktima nga si alyas John, mao na ang ni-turnover sa suspek ngadto sa Mambaling Police Station mga alas 3 sa hapon sa samang adlaw.
Ang biktima nisaysay nga gihapak sa suspek ang iyang wala nga bukton nga niresulta sa pagkabun-og niini.
Wala pa nakontento, ang suspek nibuhi og pulong nga patyon niya ang biktima.
Nasayran nga dili lang niadtong higayona gibuhat sa suspek ang maong salaud kondili sa makadaghan’g higayon.
Ang biktima nidugang nga usahay maabot pa sa punto nga mag-wild ang suspek sulod sa ilang balay ug iyang pahimungtan ang uban niyang mga manghod.
Tungod sa kahadlok sa biktima kay basin duna pa kini mabuhat nga mas grabe, nakadesisyon siya nga ipapriso ang iyahang maguwang ug pasakahan og kaso. / JDG