Gipakusgan sa San Miguel Beermen ang ilang playoff push human gitumba ang Rain or Shine Elasto Painters, 120-111, sa Philippine Basketball Association (PBA) Philippine Cup, Sabado sa gabie, Hunyo 7, 2025, sa Cagayan de Oro City.
Mipadulong na unta sa sayon nga kadaogan ang Beermen kay naglabaw man kini og 25 puntos, apan miapas ang E-Painters og midikit sa iskor ngadto sa 103-102 sa nahabiling 5 minutos sa duwa.
Apan kalmado nga mitubag ang Beermen pinaagi sa pagpanuglo ni CJ Perez nga mikamada og 33 puntos, 8 rebounds, 8 assists, tulo ka steals, ug Don Trollano nga miamot og 24 puntos, 4 rebounds ug 3 steals, ug Marcio Lassiter nga mitunol og 16 puntos sa 2-of-3 shooting sa tres para sa Beermen.
Misaka San Miguel ngadto sa 7-2 (win-loss) record.
Tungod sa ilang kadaogan, mitaas ang posisyon sa Beermen para makakuha og luna sa Top 4, samtang ang Rain or Shine natagak ngadto sa 6-4 record diin nagtabla sila sa Converge sa ikaunom nga pwesto.
Ang E-Painter misandig sa scoring trio nga sila Andrei Caracut (24 puntos), Nocum (22), ug Jhonard Clarito (17), pero kulang gihapon kini para makapilde sa Beermen.
Puntos matag-usa:
San Miguel (120) - Perez 33, Trollano 24, Fajardo 20, Lassiter 16, Tiongson 8, Cruz 6, Brondial 4, Ross 4, Cahilig 3, Tautuaa 2.
Rain or Shine (111) - Caracut 24, Nocum 22, Clarito 17, Datu 12, Santillan 10, Mamuyac 9, Tiongson 7, Porter 5, Asistio 5, Norwood 0. / RSC