Giduso sa Konseho sa Dakbayan sa Sugbo ang usa ka resolusyon isip pagpalig-on sa Electronic Referral (E-Referral) System sa tanang barangay health center sa siyudad.
Ang resolusyon nga gipasar niadtong Hulyo 22, 2025, nga giduso ni Konsehal Michelle Abella-Cellona, nagtumong sa pag-standardize, pag-upgrade, ug pag-institutionalize sa e-referral system sa tibuok siyudad.
Nahiuyon usab kini sa Universal Health Care Act (Republic Act No. 11223) ug sa mga sumbanan sa Philippine Health Information Exchange (PHIE).
Kini nagtinguha sa pagpalambo sa katulin sa pag-refer sa pasyente.
Ang mga barangay health center maoy nag-unang kontak sa mga pasyente.
"Some barangay health centers in Cebu City already utilize basic forms of electronic referrals, but there is a pressing need to standardize, upgrade, and institutionalize these systems citywide to improve timeliness, tracking, and documentation of patient referrals," matud ni Abella-Cellona sa iyang resolusyon.
Ubos sa resolusyon, ang Cebu City Health Department, inabagan sa Department of Health (DOH), maoy mangulo sa pag-institutionalize sa E-Referral System.
Ang sistema magtugot sa mga miyembro sa Barangay Health Emergency Response Team (BHERT) ug uban pang mga health worker sa barangay nga maka-electronically refer sa mga pasyente ngadto sa mas taas nga lebel sa pasilidad sa panglawas.
Magtugot usab kini kanila sa pagsubay sa kahimtang sa referral ug makadawat og feedback gikan sa mga institusyon nga midawat, gamit ang DOH eHealth ug PHIE guidelines.
Aron maseguro ang epektibong pagpatuman, unahon ang mga inisyatibo sa pagpalambo sa kapasidad.
Naglakip kini sa pagbansay sa BHERT ug uban pang mga health worker sa barangay, ingon man ang paghatag sa gikinahanglan nga kagamitan sama sa mga computer, tablet, ug kusog nga internet connection.
Ang Kagamhanan sa Siyudad mogahin sa gikinahanglan nga pundo ug teknikal nga suporta alang sa bug-os nga pag-rollout sa sistema sa tanang barangay.
Gikinahanglan nga mohatag ang City Health Department og progress report sa Sangguniang Panlungsod matag unom ka bulan, nga nagdetalye sa mga update sa pagpatuman, mga hagit, ug mga bahin nga kinahanglan pa nga ipa-uswag. / EHP