Gilugwayan sa Commission on Elections (Comelec) ang pre-voting enrollment alang sa internet voting sa mga Pilipino sa gawas sa nasod hangtod sa adlaw sa eleksyon, Lunes, Mayo 12, alas 12 sa udto.
Sa usa ka interbyu sa radyo, niingon si Comelec Chair George Garcia nga kini maghatag og kahigayunan sa mga botante sa gawas sa nasod nga maka-exercise sa ilang katungod sa pagboto.
“Hanggang bukas (Lunes) na po puwede pa kayong mag-enroll, makahabol para makaboto itong ating eleksyon na midterm national. Sa national po sila, sa senador at sa party-list,” matod ni Garcia.
“Naku five minutes lang, makakapag-enroll na kayo. Two minutes lang, makakaboto na kayo. Kaya sana i-avail natin kesa pupunta pa tayo sa embahada o konsulada.”
Ang enrollment alang sa overseas voters anaa sa: [https://ov.comelec.gov.ph/enroll](https://ov.comelec.gov.ph/enroll).
Nagsugod ang overseas voting niadtong Abril 13 nga adunay 77 Online Voting and Counting System (OVCS) posts sa tibuok kalibutan.
Sa sayo pa, niingon si Garcia nga adunay kinatibuk-ang 54,575 ang narehistrong overseas voters alang sa 2025 midterm elections.
Hangtod alas 7:00 sa gabii mahimong makabotar alang sa online ug pisikal nga mga botante. / TPM