Sumpayan og suway ni Filipina tennis superstar Alex Eala ang nagdilaab ug makasaysayon niyang kampanya sa iyang pagpakigbatok ni American Caty McNally sa 3rd round sa women’s singles event sa Canadian Open o gitawag sab nga National Bank Open sugod karong alas 8:00 sa Sabado sa buntag, Agusto 8, 2026 (PH time), sa Centre Court sa Sobeys Stadium sa Toronto.
Pipila lang ka mga adlaw human nalangkat ni Eala ang labing una niyang Women’s Tennis Association (WTA)-Tour level title sa Mubadala DC Open WTA 500 sa Washington DC, USA, nilarga dayon siya paingon sa Toronto aron mosagubang og laing malisod nga misyon.
Si Eala, kinsa bag-uhay lang nisaka sa iyang career-high nga world No. 20, nisugod sa iyang kampanya sa Canadian Open WTA 1000 pinaagi sa impresibong kadaugan batok kang American Alycia Parks, 4-6, 6-4, 6-2, sa 2nd round. Nakakuha og bye ang 21 anyos nga Pinay sa round 1st round.
Dili ikalimod nga ang maong kadaugan nakahatag og dugang kadasig ni Eala sa iyang pagpakigbatok ni McNally, 24, kinsa kasamtangang world No. 70.
Apan dili angayang molugak bisan gamay si Eala tungod kay makapadasig sab nga mga kadaugan ang nahimo ni McNally aron makaabot ning puntoha.
Gipakaging ni McNally ang Wimbledon champion nga si Czech Linda Noskova sa , 7-6(5), 6-1, sa 2nd round ug German Tatjana Maria, 4–6, 7–6, 6–1. / ESL