Nakapakita og saktong labok si Filipina tennis star world No. 72 Alex Eala una siya niyukbo batok ni world No. 2 ug defending champion Iga Swiatek sa Poland sulod sa tulo ka sets sa round of 64 sa 2025 Madrid Open niadtong Huwebes, Abril 24, sa Manolo Santana Stadium.
Si Eala, kinsa nipakaging ni Swiatek sa quarter-finals sa niaging Miami Open, nidaog sa 1st set, 6-4.
Apan human niini, nibawi si Swiatek sa nagsunod duha ka sets, 6-4, 6-2, aron sugdan sa maayong tono ang iyang kampanya sa pagdepensa sa korona ning WTA1000 clay court tournament.
“It wasn’t easy to get into the rhythm and to feel the right timing. I’m happy that I was just patient,” matod ni Swiatek nga napatik sa www.abs-cbnnews.com.
Si Swiatek, kinsa gibuntog ni Eala sa Miami Open, 6-2, 7-5, niabante sa round of 32 diin iyang ikaharong si Linda Noskova sa Czech Republic. / ESL