HINGPIT na nga nanamilit si Filipina tennis ace Alex Eala kabahin sa iyang labing unang kampanya sa Wimbledon sa London, England.
Si Eala kauban si German Eva Lys nasugamak sa kapildihan batok sa panagparis nila ni American Quinn Gleason ug Brazilian Ingrid Martins, 4-6, 2-6, sa 1st round sa ladies’ doubles category ning Grandslam event niadtong Huwebes sa gabii, Hulyo 3, 2025 (PH time).
Sila si Eala ug Lys maayong nakasugod ug nakuha nila ang kadaugan sa labing unang duwa sa 1st set apan ningbawi ra sab dayon sila si Gleason ug Martins.
Sa 2nd set, sila gihapon si Eala ug Lys ang ningdaog sa premirong duwa apan human niini, nagbangis na sila si Gleason ug Martins.
Sa sayo pa, si Eala niduwa sab sa single’s event apan gitaktak siya ni defending champion Barbora Krejcikova sa Czech Republic sa 1st round. / ESL