Nakaabante sa 2nd round si Filipina tennis star Alex Eala sa Italian Open human niya gibuntog si Magdalena Fręch sa Poland, 6-0, 3-6, 6-4, niadtong Miyerkules sa gabii, Mayo 6, 2026 (PH time), sa Rome.
Daw paingon nga dominahon ni Eala ang duwa dihang gibutlogan niya sa 1st set si Frech apan nausab ang dagan sa duwa sa 2nd set diin nakaposte og 3-1 nga labaw si Frech.
Nakamaneho pagtabla si Eala, 3-3, apan human niini, nisagunson og tulo ka mga daog si Frech aron dag-on ang set.
Sikit na kaayo ang hinampakay sa 3rd set apan nasugakod ni Eala ang mga pagpanghulga ni FREch aron iposte ang labing una niyang daog ning maong kompetisyon.
“I’m really proud of myself because there were so many moments, especially in the third set, where she could’ve gone really far,” matod ni Eala nga napatik sa www.abs-cbnnews.com.
Sa 2nd round, kontrahon ni Eala si Chinese Xin Wang, kinsa nakakuha og bye sa 1st round. / ESL