Nakaabante sa quarter-finals si Filipina tennis ace Alex Eala sa Eastbourne Open human niretiro ang iyang kontra sa Round of 16 nga si Jelena Ostapenko sa Latvia niadtong Miyerkules sa gabii, Hunyo 25, 2025, sa United Kingdom.
Gibutlogan ni Ostapenko si Eala sa 1st set, 6-0, apan nibawos ang 20 anyos nga Pinay sa 2nd set, 6-2.
Sa 3rd set, naglabaw si Eala, 3-2, dihang niretiro si Ostapenko gumikan sa nasinati niining ankle injury.
Gipasabot ni Eala nga wala siya nakauyon nga nakadaog tungod sa nahitabo ni Ostapenko ug igo na lang siya sa pagpanghinaot nga maalim ra dayon ang Latvian niyang kaatbang.
“I wish her a speedy recovery and I’m super happy to be able to play again in this beautiful place,” matod ni Eala nga napatik sa www.gmanews.tv. / ESL