
Niambak na sab og laing duha ka mga puwesto si Philippine tennis ace Alex Eala gikan sa No. 75 ngadto sa No. 73 sa bag-ong rankings nga gipagawas sa Women’s Tennis Association (WTA) niadtong Lunes, Abril 7, 2025.
Kini gumikan sa makasaysayon niyang pagduwa sa 2025 Miami Open diin nakasulod siya sa semi-finals.
Pagkahuman sa iyang kampanya sa Miami Open, si Eala niambak og taas gikan sa No. 140 ngadto sa No. 75.
Bisan wala pa siya niduwa og laing torneyo, nisaka ang puwesto ni Eala tungod sa resulta sa kampanya sa mga magduduwa nga nag-una kaniya sa world rankings.
Si Eala, 19, magpadayon sa iyang kampanya sa clay season ug nanghinaot siya nga masumpayan ang iyang maayong performance sa Miami Open.
Sa usa ka Instagram story, gipaambit ni Eala ang sunodsunod nga torneyo nga iyang salmutan sa umaabot nga magsugod karong Abril 14 sa Oeiras Ladies Open sa Portugal, usa ka WTA125 event. / ESL