Nibalik pag-training si Filipina tennis star Alex Eala sa hard courts sa Rafa Nadal Academy sa Mallorca, Spain.
Gipakatap ni Eala kining maong kalambuan pinaagi sa iyang social media post.
Maayo kini nga kalambuan alang sa kasamtangang world ranked no. 68 player nga si Eala kinsa wala nidayon pagsalmot sa Cincinnati tournament ning bag-uhay lang tungod sa angol sa iyang abaga nga naghasol kaniya atol sa iyang kampanya sa Montreal Open.
Niadtong Hulyo 28, 2025, ang 20-anyos nga si Eala gimakmak ni Czech player Marketa Vondrousova, 6-3, 1-6, 2-6, sa Canada tungod ning maong pagkaangol.
Ang pagbalik og training ni Eala nagpasabot nga naalim na ang iyang angol.
Si Eala nangandam na og sugod alang sa iyang sunod nga tahas nga mao ang US Open.
Dili pa lang dugay, nius-os ang ranking ni Eala sa Women’s Tennis Association (WTA) gikan sa No. 65 tungod sa iyang dili maayong kampanya sa niaging mga torneyo nga iyang gisalmutan.
Ang labing taas nga naabot ni Eala sa WTA rankings mao ang No. 56. / ESL