
Human sa iyang makasaysayong kampanya sa Eastbourne Open diin nakaabot siya sa finals ning bag-uhay lang, sagubangon ni Filipina tennis ace Alex Eala karong Martes, Hulyo 1, 2025 (PH time) ang labing lisod niyang tahas.
Gitumbok mao ang pagpakigbatok ni Eala sa defending champion nga si Barbora Krejcikova sa Chech Republic sa 1st round sa Wimbledon Classic sa London.
Ning pagsuwat, wala pa masayri kon unsang orasa mapahigayon ang sangka.
“Super excited! I’m always in awe when I come here,” matod ni Eala sa usa ka press conference paghiabot niya sa Wimbledon nga napatik sa www.abs-cbnnews.com.
“It’s my first time in the main draw. I’m going up against the defending champion—excited to see how that turns out.”
Dili ikalimod nga grabe ka inilog ning sangkaa si Krejcikova, kinsa kasamtangang world ranked No. 17 ug aduna na’y walo ka WTA titles.
Hinuon dili mabangbang ang kadasig ni Eala hilabi na kay nisaka siya sa No. 56 gikan sa No. 74 human sa iyang kampanya sa Eastbourne ug gituohang makatabang kini niya og dako. / ESL