Gisugdan na ni Filipina tennis star Alex Eala ang iyang transisyon ngadto sa clay court pinaagi sa pag-training sa indoor red clay courts sa Rafa Nadal Academy sa Mallorca, Spain diin siya nagpabaid og maayo sa iyang abilidad sukad pa kaniadto.
Sugdan ni Eala ang iyang kampanya sa clay season pinaagi sa pagsalmot sa Upper Austria Ladies Linz Open nga gikatakda karong Abril 6-12, 2026.
Ang Linz Open, nga usa ka Women’s Tennis Association (WTA) 500 event, gilaumang salmutan sab og laing dekalidad nga mga magduduwa nga naglakip nila ni defending champion Ekaterina Alexandrova sa Russia, Clara Tauson sa Denmark, Emma Raducanu sa Britain, Emma Navarro sa US, Jelena Ostapenko sa Latvia.
Gawas sa Austria tournament, si Eala nakatakda sab moapil sa Women's Stuttgart Open sa Germany karong Abril 13-19, ug Madrid Open karong Abril 21-Mayo 3.
Si Eala gikan sa iyang kampanya sa Miami Open diin nakatilaw siya og kastigo batok ni Karolina Muchova sa Czech Republic, 6-0, 6-2, sa round of 16.
Ning maong kapildihan, nahagsa si Eala gikan sa No. 29 ngadto sa No. 45 sa bag-ong WTA world rankings. / ESL