Nasugamak sa laing first round nga kapildihan si Filipina tennis ace Alex Eala batok ni world No. 152 Linda Fruhvirtova sa Czech Republic, 7-5, 6-7(5), 6-1, sa Birmingham Open women’s singles sa United Kingdom sa Miyerklules sa buntag, Hunyo 4, 2025 (PH time).
Si Eala kinsa world ranked No. 73 ug 3rd seed sa kompetisyon, nabutlogan human sa duha ka duwa.
Hinuon, nigukod si Eala ug nakatbla siya human sa walo ka duwa, 4-4. Nagtabla sab ang hinampakay, 5-5, una nakabulhot si Fruhvirtova aron dag-on ang set.
Nibawi si Eala sa 2nd set sa laing kulbahinam nga engkuwentro apan lahi na ang dagan sa estorya sa 3rd set gumikan kay nidominar lang og kalit si Fruhvirtova.
Ning maong kompetisyon, niduwa sab si Eala sa women’s doubles sa niagIng pipila ka mga adlaw diin kaabag niya si Swiss partner Rebeka Masarova.
Napilde sab sa 1st round si Eala ug Masarova batok sa Australians nga sila si Storm Hunter ug Ellen Perez, 6-4, 6-4.
Mosalmot pa og dugang grass-court tournaments sa UK si Eala sa tinguha nga molambo pa ang iyang abilidad sa grass-court. / ESL