Nakasulod sa quarter-finals si Filipina Alexandra Eala sa Miami Open human ni-withdraw ang iyang kontra sa top 16 nga si world No. 11 Paula Badosa sa Spain ning Martes sa buntag, Marso 25, 2025 (PH time), gumikan sa nasinati niining lower back injury.
“Not the way I would want to move on to my first WTA1000 QF. I wish Paula a speedy recovery,” mensahe ni Eala sa Instagram nga napatik sa AFP.
Sa quarter-finals, si Eala, 19, makigsangka ni world No. 2 Iga Swiatek sa Poland, kinsa nilupig ni Elina Svitolina sa Ukraine, 7-6 (7-5), 6-3 sa ilang top 16 nga hinampakay.
Niadtong Dominggo, Marso 23, nakakulit og kasaysayan si Eala human niya gipakaging si Australian Open champion Madison Keys.
Si Eala mao ang labing unang tennis player sa Pilipinas nga nakabuntog og magduduwa nga naa sa world top 10 sukad gigamit ang ranking system, 50 ka mga tuig na ang nakalabay. / ESL