NIABANTE sa semi-finals si Filipina Alex Eala sa 2025 Eastbourne Open human niya gilupig si Dayana Yastremska sa Ukraine, 6-1, 6-2, ning Huwebes sa gabii, Hunyo 26 (PH time), sa United Kingdom.
Mao kini ang labing unang higayon nga nakataak sa semis si Eala sa grass court sa Women’s Tennis Association (WTA) Tour.
Gikan sa sinugdanan, tataw ang determinasyon ni Eala ug agresibo kini sa iyang mga ataki aron lupigon ang iyang World no. 42 nga kontra.
“I think, more than anything, it’s just the mentality,” matod ni Eala nga napatik sa www.abs-cbnnews.com.
“Of course, with these great players and these tough conditions, it could be hard to balance that patience and the will to go for the ball. So I think I did that well throughout the whole week.”
Sa semis, si Eala, kinsa kasamtangang World No. 74, makigbatok ni Varvara Gracheva sa France, kinsa iyaha nang nalupig ning bag-uhay lang sa 1st round sa Nottingham Open qualifiers. / ESL