Nanamilit og sayo si Filipina tennis ace Alex Eala sa iyang kampanya sa Italian Open singles event sa Rome.
Si Eala nakatilaw og kastigo sa 1st round o Round of 128 batok ni world No. 27 Marta Kostyuk sa Ukraine, 6-0, 6-1, sa Huwebes, Mayo 8, 2025 (PH time).
Padayon pa hinuon ang kampanya ni Eala diin makig-uban siya ni 2023 US Open champion ug world No. 3 Coco Gauff sa doubles event.
Human sa makasaysayon niyang kampanya sa niaging Miami Open diin nakaabot siya sa semi-finals, nisaka si Eala gikan sa world ranked 140 ngadto sa no. 70.
Apan human sa Miami Open, wala na nakapakita og saktong labok si Eala sa nagsunod nga mga torneyo nga iyang gisalmutan.
Sa wala pa siya nihamag sa Italian Open, niduwa si Eala sa Madrid Open diin gipilde siya ni world No. 2 Iga Swiatek sa Poland sa Round of 64. / ESL