
Nakasukol sa grabeng hinampakay si Filipina tennis ace Alex Eala una siya niyukbo sa defending champion nga si Barbora Krejčíková sa Czech Republic sa first round nga niabot og tulo ka sets sa Wimbledon sa London, England niadtong Martes sa gabii, Hulyo 1, 2025 (PH time).
Si Eala, 20, nipakita og wala’y kahadlok batok sa tang-an niyang kontra ug nakuha niya ang kadaugan sa 1st set, 6-3.
Apan sa 2nd set, bangis nga nibawos si Krejčíková, 6-2.
Mas nagbangis si Krejčíková sa 3rd set ug iyang gimakmak si Eala, 6-1, aron humanon ang hinampakay sulod sa duha ka mga oras ug unom ka mga minutos.
Human sa duwa, gidayeg ni Krejčíková si Eala, kinsa nisaka isip world ranked No. 56 human siya nakaabot sa finals sa niaging Eastbourne Open.
“I would like start with giving the credit to Alex. The way she played in the first set, she was smashing the ball and she was cleaning the lines and all that,” matod ni Krejčíková nga napatik sa AFP News.
“Wow, wow, it’s the next generation coming. She’s gonna come up and she’s gonna be really good in a couple of years..
Mao kini ang labing unang pagduwa ni Eala sa Wimbledon. / ESL