Padayong makasinati og kaalimuot ug init nga panahon ang Cebu tungod sa pagpatigbabaw sa Easterlies sa umaabot nga mga adlaw, matod sa state weather bureau.
Kini nakapasamot sa naglungtad nga hulaw tungod sa El Niño phenomenon ug sa nagpadayon nga uga, ting-init nga panahon, sumala sa mga eksperto sa Philippine Atmospheric, Geophysical and Astronomical Services Administration (Pagasa).
Ang Easterlies sa tropikal nga mga nasod sama sa Pilipinas nagtumong sa hanging sidlakan nga nagdalag init, umog nga hangin gikan sa Dagat Pasipiko, nga moresulta sa alimuot ug init nga kahimtang.
Si Alfredo “Al” Quiblat Jr., hepe sa Pagasa Visayas, niawhag sa publiko nga mag-amping, sama sa pagpabiling hydrated, tungod kay ang taas nga heat index gilauman nga magpadayon sa tibuok semana.
“Padayon ta makasinati og init, alimuot o alingasang nga panahon. So, taas atoang temperatura,” matod niya sa SunStar Cebu niadtong Dominggo, Abril 14, 2024.
Matod ni Quiblat, ang Sugbo gipaabot nga adunay surface air temperature gikan sa 27 ngadto sa 34 degrees Celsius karong semanaha.
Makasinati og heat index ang dakbayan sa Sugbo tali sa 37 ngadto sa 38 degrees Celsius sa mosunod nga duha ka adlaw.
Ang indeks sa kainiton niini nga lebel nagpakita sa posible nga heat cramps ug heat exhaustion, ug ang dugang nga kalihukan mahimong moresulta sa usa ka heat stroke.
Ang Easterlies gilauman usab nga magdala og mga pag-ulan sa hapon o sa gabii.
Sa buwag nga pakighinabi niadtong Dominggo, ang weather specialist nga si Jhomer Eclarino miingon nga kini nga mga pag-ulan makadiyot ra, niingon nga ang publiko makasinati gihapon sa init nga panahon sa kasagaran.
Sa sayo pa, si Dr. Eugenia Mercedes Cañal, usa ka regional epidemiologist gikan sa Department of Health Central Visayas, niawhag sa publiko sa pagsunod sa mga safety measures panahon sa grabeng kainit. /