Editoryal: 2 ka trahedya tungod sa armas

EDITORYAL
EDITORYAL

Nitumaw sa imbestigasyon sa kapulisan sa Dakbayan sa Tali­say nga di diay laing tawo ang nakapatay sa 14 anyos nga dalagita, kon di ang iya ra diay igsuon nga lalaki. Nitumaw sa imbestigasyon sa kapulisan nga natagak ang pusil gikan sa bulsa sa igsuon ug nibuto.

Ang biktima nga naghigda niadtong higayuna naigo sa nawong ug nilapos ang bala sa ulo. Ang mga sakop sa pamilya ug silingan giingong “nagsabot” sa “script” sa hitabo aron unta tabunan ang krimen, apan dunay nakuha nga ebidensya ang kapulisan nga ang pamilya nagsabot sa script.

Matod sa Camp Crame nga nitumaw sa imbestigasyon sa kapulisan nga giguba pa sa mga sakop sa pamilya ang pultahan aron ingnon nga dunay tawo nga nipugos pagsulod sa balay.

Gipasakaan na sila og managlahing mga kaso.

Sa Sagay City, giingong napatay sa 7 anyos nga bata nga lalaki ang iyang amahan nga polis human niya kini pusila dihang nag-away ang iyang mga ginikanan.

Nasuko ang polis human niya nakita nga ni-engage ang iyang kapuyo sa pipila ka Tiktok followers. Nitumaw nga selos hangtod nagkalalis ug pisikal nga nagsambunot.

Giingon nga nikuha ang bata sa service firearm sa iyang amahan ug iyang gipusil. Ang polis naigo sa liog ug namatay. Kana mao pa say bersyon sa kapuyo nga mao say inahan sa bata.

Wa pa hingpit nga nituo ang kapulisan sa bersyon sa pamilya mao nga silang tanan gipailawom sa paraffin test alang sa nagpadayon nga imbestigasyon.

Di sab kadto unang higayon nga nakuha sa anak ang pusil sa iyang amahan kay sa miaging away sa mag live in partner nakuha sa bata ang pusil apan nailog kini sa amahan, sumala gihapon sa kapuyo.

Apan matod sa kapulisan nga di pa sila makatuo nga ang bata maoy nakapusil o dunay kapabilidad sa pagpusil kay mahimo ra kining excuse kay di man mapriso ang bata kay menor pa.

Sa duha ka mga trahedya, ang komon mao ang armas. Sa hitabo sa Dakbayan sa Talisay, natagak ang pusil gikan sa bulsa sa igsuon sa biktima, matod sa kapulisan.

Sa Sagay, ang armas giingong nakuha sa bata gikan sa box nga plastik nga gisudlan sa service firearm. Kon tinuod ang sulti sa kapuyo, sayon rang na-access sa bata ang armas.

Kining duha ka mga hitabo maisip nga pulos pagpabaya sa paghipos sa armas. Kompyansa nga paghupot niini ang makita sa duha ka mga hitabo nga nisangko sa trahedya sa duha ka mga pamilya nga nikutlo og mga kinabuhi.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph