Editoryal: Abi kay kabos man

Editoryal
Editoryal

Mopasaka og kaso ang 18 sa 200 ka mga pamilya nga naapektuhan sa 2022 flood control project, kinsang mga balay gipangguba apan gisaaran sila og relocation site nga hangtod karon wa natuman.

Ang mao nga mga pamilya nahawa sa ilang gipuy-an sa Kinalumsan River. Matod ni Novelardo Diacamos, representante sa grupo, nga gisaaran silang 200 ka mga pamilya og relocation assistance apan wa naabot human sa duha ka mga tuig. Nagbalhinbalhin na lang sila og puyo sa malisod kaayo nga mga puy-anan samtang nagpaabot sa gisaad nga kutob ra sa saad kun laway ra.

Busa, nakahukom sila sa pagpasaka og kaso batok kanila ni suspended Mayor Michael Rama ug kaubang mga opisyal ingon man sa regional officials sa Dept. of Public Works and Highways (DPWH) ug National Housing Authority. Sulod sa tulo ka mga buwan sila nakadawat og tag P12,000 kada buwan aron iabang og kapuy-an.

Human ani, wala na sila nakadawat busa ang ilang kalisod nisamot pa. Unsa man gipang-ilad sila sa kagamhanan nga nisaad nga duna silay relocation site apan wa diay? Kay kon tinuod pang duna silay kabalhinan, di unta maingon niini ang kahimtang sa ilang pagpuyo.

Karon seguradong nagtulodtulod na sila kinsa ang manubag, ang local government unit ba o ang nasudnong kagamhanan nga maoy naghupot sa proyekto. Ang tanan man tingali nga buhatan sa kagamhanan ang angay manubag.

Di makapanghunaw ang LGU tungod kay sila unta ang unang manalipod ug maneguro nga dunay kabalhinan ang iyang mga lumolupyo nga apektado. Ang nasudnong kagamhanan di unta angay mopatuman sa proyekto kon di pa andam ang kabalhinan nga dapit.

Apan sama sa nangagi nga mga hitabo, tungod kay mga kabos, sayon ra kaayo nilang nahinginlan ang mao nga mga tawo nga namuyo daplin sa kasapaan. Apan ang dagkong mga balay ug mga establisemento nga nakahimo sa samang kalapasan, nagpabilin nga nagbarog nga bisan usa lang ka tipaka sa ilang edipisyo o istruktura wa matandog.

Pagkamakaluluoy sa mga kabos ug uyamot.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph