Ang pagkamatay ni Pope Francis niadtong Lunes, Abril 21, 2025, atol nga Easter Monday, ang adlaw nga nagsimbolo sa pagkabanhaw ug paglaom alang sa mga Kristiyano sa tibuok kalibutan, ang nagdala og espirituhanon ug emosyonal nga gibug-aton.
Ang iyang pagtaliwan timaan sa pagtapos sa iyang papacy ug pagdumala isip lider sa simbahang Katoliko dinhi sa kalibutan.
Si Pope Francis, kon Jorge Mario Bergoglio giila nga usa ka ligdong nga lider nga mapaubsanon, isog nga miatubang sa mga pagsuway ug dili matugkad ang iyang pagkamaalagaron ngadto sa Diyos ug ang pagpaambit sa mga pagtulon-an nga anaa ang values of compassion, inclusivity, ug ang social justice.
Mas gipili niya nga ipabilin ang simple inay ang kahalangdon, ang panag-istorya kaysa dogma, ug ang kaluoy kaysa paghukom.
Sa iyang gihimo nga paghugas sa mga tiil sa mga binilanggo ngadto na sa pagpanalipod sa kinaiyahan ug sa kabus, iyang gipadayag ang usa ka Simbahan nga naglakaw uban sa mga giilang kabus, imbes nga maghari ibabaw nila.
Apan ang suliran sa iyang panglawas nakababag sa iyang misyon, apan pinaagi niini mas gipalawman ang iyang pagtuo sa Labaw’ng Makagagahum ug paghalad sa iyang pag-antos sa gihambin nga balatian.
Samtang nangandam ang Simbahan sa pagpahiluna sa iyang lawas, kita gipahinumdoman nga ang pagkagamhanan o pagkabantugan dili masukod pinaagi sa gahum o dungog, apan pinaagi sa gugma.
Si Papa Francisco nagbilin og panulondon dili lang isip Santo Papa, kon dili isip tawo—usa ka panawagan sa pag-amuma nga mas lawom, magpuyo nga mas yano, ug pagsunod ni Kristo.
Panghinaot sa kadaghanan ang iyang malinawon nga pagpahuway ug masiguro nga dili hikalimtan sa Simbahan ang pagpasidungog sa iyang kinabuhi, dili lang pinaagi sa rituwal, kon dili pinaagi sa padayong reporma, kaluoy, ug pag-alagad sa kinabag-an.
Papa Francisco, magpabilin ka sa among panumdoman ug sa among tagsa-tagsa ka mga kasingkasing dungan sa among mga pag-ampo alang sa imong malinawon nga pagpahuway. Adios