Kon mo-operate na ang Cebu Bus Rapid Transit (BRT), giingon nga labing una ug bugtong natad kini sa public mass transportatiuon sa Pilipinas.
Mao ba? Tinuod man tingali kini.
Apan unsa kaha’y dagan niini? Sa konstruksyon pa lang gani, daghan na nga mga kakulian ang naagian kining maong proyekto, nga usa sa mga gipatukod ni Cebu City Mayor Mike Rama alang sa iyang gitinguha nga Singapore-like Cebu.
Matod pa, usa kini sa labing maayong mga solusyon aron masulbad ang nagkahuot nga problema sa trapiko sa dakbayan.
Masulbad kaha ang trapiko kon wala’y dakong kausaban nga mahitabo kabahin sa operasyon sa BRT? Ambot lang kaha sa langaw.
Kining bus stations nga gipangtukod, giingon nga mao ra kini ang lugar diin mopasakay ug mopakanaog og mga pasahero ang mga drayber sa bus.
Ang pangutana, dili kaha matintal ang drayber pagpasakay og pasahero – ibutang nato mga 10 ka buok – sa dili bus station nga lugar hilabi na kon wala’y sulod ang bus? Dili kaha ang presensya sa traffic enforcers ra ang bantayan sa mga drayber?
Dili ikalimod nga ang pagpasakay ug pagpakanaog og pasahero sa bisan asa nga dapit usa sa mga hinungdan nga makapahuot sa trapiko.
Sa ubang malambuong mga nasod partikyular ang Singapore, ang mga drayber sa bus siyento prosiyento’ng dili magpataka sa pagpasakay ug pagpakanaog og pahasero. Sa bus stations ra gyud kini mahitabo.
Kini gumikan kay empleyado sa bus operators ang mga drayber. Nagpasabot, suweldado kini bisan kanunay magdagan ang bus nga wala’y pasahero.
Tradisyon na sa transportasyon sa Pilipinas nga mag-abang ang mga drayber sa operators maong maninguha kini nga makahakot og mga pasahero bisan nakasupak na sa lagda sa trapiko.
Sa pagkakaron, wala pa man tingali napili ang Department of Transportation (DOTr) kon kinsa nga bus operators ang ilang pasudlon sa BRT project.
Kon kinsa man gani nga bus operators ang mapili sa DOTr, andam ba kaha kining mohatag na lang og suweldo sa drayber kaysa magpaabang? Ambot lang kaha sa langaw.