Editoryal: Andam na ba sa pedestrianization?

Editoryal: Andam na ba sa pedestrianization?
EDITORYAL

Sama na unya sa ubang mga dapit sa abroad, maglakaw na unya ang mga tawo sa downtown, labina sa Dalan Colon ug ubang sikbit nga mga dapit hangtod na sa city hall. Tipik kini sa pedestrianization sa heritage sites nga sagad naa sa downtown area nga maoy sentro sa patigayon sukad sa karaang panahon hangtod na sa mga dekada 80.

Plano sa Siyudad ang environment-friendly nga palibot ang masinati sa mga tawo, diin mga tartanilya na lang ang tugotan nga makapasakay og mga pasahero. Apan maorag dunay bukol ang mao nga plano kay pasudlon pa man ang pribado nga mga sakyanan.

Bisan sa pedestrianization naa gihapon ang “carcentric” nga panghuna-huna. Maora bag ang pagpalambo sa usa ka dapit di mahitabo kon way labot ang pribado nga mga sakyanan. Ngano man, mahadlok ang city officials nga mangasuko ang mga magpapatigayon sa downtown Cebu City?

Mao bitaw nga sa ingon niini nga konsepto, ilambigit unya ang mga apektado, labina sa mga nagpuyo ug mga negusyante sa downtown aron mahisgutan ang mga pamaagi kay sila ang unang maapektuhan.

Mapangitaan daan og solusyon ang mga problema nga posible nga pagpatuman sa pedestrianization. Mosugot o sa dili ang Siyudad, daghan pa sa mga dapit sa karaang business district kansang mga edipisyo gipuy-an sa mga negusyante nga nabuhi sa ilang patigayon sukad pa kaniadto.

Unsaon sa pagdala o paghakot sa mga supply sa mga balay patigayon kon di na kini pasudlan og mga sakyanan?

Sagad sa mga proyekto sa gobyerno nanglaktaw sa mga proseso diin unta matuki ang posibleng mga problema nga mahatagan unta og solusyon samtang wa pa kini mapatuman. Sa ato pa, bisan unsa ang mahitabo, ang tanan naandaman na og solusyon busa kon duna may problema nga motumaw, masulbad kini dayon.

Daghan sa nasudnong mga proyekto sa nasudnong kagamhanan nga gipatuman nga wa gani konsultasyon, gidali-dali ang proseso. Mao nang sama sa naglabay og kwarta gikan sa publikong kaban.

Klasiko nga ehemplo niini ang kapin sa 100 ka kilometro nga bike lanes nga gibutang sa mga Dakbayan sa Sugbo, Mandaue ug Lapu-Lapu taliwa sa kusog pa ang Covid-19. Karon, maihap na lang ang mga dapit sa Siyudad nga makita ang mga lane nga sama na lang og drawing sa daplin sa mga karsada, way gamit.

Hinaot pa nga sa pagpatuman sa pasiunang partial nga pedestrianization sa downtown Cebu City, ang mga problema nga posible nga motumaw napangandaman na.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph