Nagbalikbalik ang problema sa kakuwang sa tubig matag tuig, matag igo sa El Niño phenomenon sa Pilipinas. Usa sa apektado niini mao ang Sugbo. Kada ting-init, hapit na manghubas ang kasapaan, nga nakaapekto sa water supply sa Metropolitan Cebu Water District (MCWD). Kada tuig ni apan mograbe lang kon maghuwaw na gyud.
Mao nang kataw-anan ang mga proposal nga manggama og dam sa kasapaan kay asa na man og tubig kon manghubas ang kasapaan nga maoy tinubdan sa tubig sa mga dam? Di baya barato ang pagtukod niani nga mga imprastraktura. Gikinahanglan ang bilyunes o milyunes ka pesos nga pundo aron kini matukod.
Dinhi gamit kaayo ang mga desalination plant nga nagkuha og tubig sa kadagatan nga naghimo sa tubig nga mainom ug magamit sa uban pang mga panginahanglan.
Sa teknolohiya karon, ang mga makina sa desalination magkabarato. Inay nga mag-invest sa mga dam, mas maayo pang tutokan ang pagpadaghan sa mga desalination plant nga kasaligan kon magnihit na ang supply sa tubig gikan sa kasapaan.
Lagi, kon magkabarato na ang makina sa desalination, mapaabot usab nga ang mahal nga tubig nga supply niini mobarato. Di na pil-on og kadaghan ang presyo niini itandi sa naandang tubig gikan sa surface ug underground nga mga tinubdan. Mao ra ni ang kasaligan nga tinubdan sa umaabot nga katuigan tungod sa nagkagrabe’ng epekto sa global warming.
Inay magpa invest ang Siyudad sa Sugbo og mga imprastraktura sama sa dam, mas maayo pa nga ang dagat maoy tutokan niini. Segurado pang matapakan ang kakuwang sa panginahanglan sa mga Sugboanon sa tubig, nga kadaghanan nag-antos sa kakuwang o wa gyuy supply.
Tutokan usab sa MCWD ang pagpahibalik sa supply sa tubig sa mga dapit nga wa na mapaagasi og tubig sa dugay nang panahon kay hayan, naputol na ang mga tubo niini tungod sa mga road project nga wa gitarong pag coordinate sa mga contractor ngadto sa water firm. Kon kini maplantsa, wa nay Sugboanon nga uhawon sa tubig.