Grabe ang epekto sa bagyo ug habagat sa Metro Manila ug ubang mga dapit sa Luzon kay gibahaan taliwa sa grabe, way hunong nga pagbunok sa uwan sa Miyerkules, Hulyo 24, 2024. Daghan ang nanga stranded sa karsada. Dunay mga hulagway nga usa ka bus nasanapan na sa tubig busa ang mga pasahero nanaka sa atop, naghuwat nga ma-rescue.
Nang-awas ang pipila ka dagkong mga sapa hinungdan sa pagpatuman sa pugsanay nga pagpabakwit kay gawas nga lawom, daghang mga balay ang nasudlan sa tubig.
Ning hitabua, segurado nga bilyon ka pesos ang danyos sa mga patigayon ug mga kabtangan kay wa nakairog ang negusyo ug nangadaut ang mga kabtangan.
Dunay mga magbabalaud nga dali kaayo nga nakabasol sa reclamation areas. Kay ang reclamation areas nangtadlas sa mga dapit nga naandan nga agianan sa tubig ug nakabara sa naandan nga agos niini.
Makapakurat ba ang nahitabo sa Metro Manila ug ubang mga dapit sa Pilipinas nga naigo sab sa epekto sa Habagat nga nagdala og grabeng ulan? Dili gyud. Ang mga eksperto daan nang nagpahimangno nga ang Pilipinas usa sa lima ka mga dapit sa kalibutan nga apektado kaayo sa global warming. Usa sa mga dapit sa kalibutan nga dali kaayo nga maigo sa katalagman.
Ma El Niño o La Niña man, ang Pilipinas sama sa usa ka boksidor nga kulatado, maigo bisan asa nga anggulo, mao nang matumba kanunay.
Ang nakapasamot sa mga katalagman sama sa huwaw ug grabeng ulan nga magdala og baha ug landslide mao ang mga land development. Dinhi lang sa Metro Cebu, ang kanhi mga dapit nga di bahaanan, karon panglunopan na. Ang wa maigo sukad sa landslide, natabunan na.
Busa, gikinahanglan unta nga sa pagpalambo ikonsiderar usab ang di maayo nga mga epekto sa land development, sama sa reclamation, sa iyang mga palibot.
Maanindot unta ang reclamation kay ang tumong niini mao ang economic development sa usa ka lokalidad, apan kon makaguba kini sa kalikupan ug makaapekto sa mga lumolupyo nga mao unta ang makabenepisyo, apan mag-antos ra diay sa pagpuyo, mas maayo nga di na lang idayon.
Mag-unsa man ang ekonomikanhong kalambuan kon ang mga tawo nga makabenepisyo niini mag-antos ra diay tungod sa iyang dautan nga epekto?
Busa, sa matag land development, di unta laktawan o piyungan ang environmental impact sa pag-assess sa proyekto. Apan makaguol kay ang mga naa sa gahom ug katungdanan mopiyong niini basta makakita na og minilyon ka pesos nga katarungan.