Sa bisan unsa nga natad sa sugal, duha ra gyud ang sangputanan – daog ug pilde. Kon modaog, lipay apan kon mapilde, minghoy.
Wala tingali mosupak nga sa kasagaran, mas dako ang mapilde sa usa ka sugarol kumpara sa madaog niini. Mao kini ang paet nga kamatuoran sa sugal.
Apan nganong daghan man gyud ang maungo sa sugal nga dayag man nga maghatag ra kini og kaalautan sa kinabuhi.
Ang dugang paet pa gyud niini, posibleng mahaylo sa paghimo og krimen ang usa ka tawo nga naungo na sa sugal.
Sama na lang sa nahitabo sa usa ka tindero sa vape shop sa dalan Englis V. Rama Avenue, Barangay Guadalupe, Siyudad sa Sugbo ning bag-uhay lang.
Ang maong tindero nabalhog karon sa bilangguan human gipadakop sa iyang amo nga si Marc Wilbert Lim See, tag-iya sa New Life Vapers diin nagtrabaho ang gitumbok nga tindero.
Gipadakop ni See sa awtoridad ang iyang tindero human kini niya nasakpan nga nikawat og P24,000 cash nga halin sa vape shop ug disposable vapes nga nagbalor og P40,000.
Niangkon ang tindero sa iyang nahimo nga krimen ug nipasabot nga iya kining nabuhat tungod sa iyang pagkaungo sa “scatter,” usa ka natad sa sugal sa online.
Sa tanan niyang nadispalko, P7,500 na lang ang na-recover gikan kaniya kay ang kadaghanan nahurot pagkapilde sa scatter.
Porbida’g ngano. Matod sa tindero nga namasin siyang makadaog og dako nga kantidad aron mauli niya ang iyang nadispalko.
Matod pa sa tindero nga naungo siya’g samot sa scatter dihang nakadaog siya og P750,000 sa niaging tuig. Ambot kon asa niya nagamit kining maong kantidad. Kasagaran biya aning gitawag og “kuwarta sa hangin” dali ra mahanaw nga sama sa usa ka bula.
Naadik na gyud tingali kining maong tindero sa scatter kay ikaduha na man diay kining higayon nga nangawat siya og halin sa vape shop aron isugal.
Sa niaging tuig, nakadispalko siya og P300,000. Nangayo siya’g pasaylo. Tuod man, gipasaylo siya sa iyang amo ug inanay siyang gipabayad pinaagi sa salary deduction.
Ning higayuna, nangayo na sab og pasaylo ang tindero apan napupos na ang pasensya sa iyang amo ug gipapriso na siya niini.
Kining nahitabo sa tindero hinaot mahimong leksyon ug magpahinumdom sa mga sugarol nga wala’y maayong sangputanan ang bisan unsa nga natad sa sugal.
Mas maayong mobiya na niining bisyuha ang usa ka sugarol samtang wala pa masinati niini ang nasinati sa nahisgutang tindero.