Editoryal: Angay susihon ni Garcia

EDITORYAL
EDITORYAL

Usa ka tuig na dihang gisirado ang Cebu City Sports Center (CCSC) tungod sa major renovation sama sa pag-ilis sa rubberized oval alang sa pag-host sa 2024 Palarong Pambansa sa Hulyo, nga kapin na lang sa usa ka buwan gikan karon.

Apan ning ulahi nabutyag nga wala gihapon mahuman pagtrabaho ang oval dihang nibisita si Acting Mayor Raymond Alvin Garcia sa CCSC niadtong Lunes, Mayo 20, 2024.

Sa wala pa ang pabisita ni Garcia sa pasilidad, ang publiko nagtagna-tagna bahin sa kalamboan sa trabaho sa CCSC.

Gidid-an ang publko sa pagsud. Sa laktod, ang pagdumala sa renobasyon sa CCSC dili sihag o transparent.

Nakamugna kini og daghang kwestiyon. Wa kita magsulti nga dunay nahitabo nga korapsiyon apan, dili usab layo ang posibilidad.

Ug sa samang higayon sa pagsusi sa CCSC, si Garcia, atol sa press conference, nimando sa dinalian nga suspensiyon sa procurement orders alang sa Palarong Pambansa.

Buot si Garcia masayod kon ang dugang pamaliton ‘satisfactory’ ug pag-ila sa mga prayoridad ug mamati sa pagpasabot kon nganong nalangay ang trabaho.

Dili basta-basta kini, P400 milyunes ang budget sa pag-host sa Palarong Pambansa 2024.

Lakip sa budget mao ang pagpalambo sa sports facilities, 20 ka tunghaan isip billeting quarters, pagpamalit og sports equipment, instalasyon sa LED outdoor-field lights nga moabot og P23 milyunes, digital-visual LED display uban sa support frames, posts nga moabot og P135.186 milyunes ug grandstand extension nga P47 milyunes.

Kini ug uban pa ang angay subayon sa pakisusi ni Garcia sulod sa tulo ka adlaw, diin posible dunay palitunon nga kunhoran o kaha wagtangon sa budget.

Giklaro ni Garcia nga padayon ug iyang papaspasan ang renobasyon sa CCSC human nagkaduol na ang pagpahigayon dinhi sa labing dako nga kompetisyon sa paugnat-sa-kusog sa nasod.

Busa, angayan lang susihon ni Acting Mayor Garcia ang pagpangandam alang niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph