Gisugdan na sa Traffic Enforcement Agency of Mandaue (Team) ang pagpanakop sa mga modern public utility jeepney (MPUJ) nga mag-overloading isip pagsuporta sa “Anti-Sardinas” policy sa Land Transportation Franchising and Regulatory Board (LTFRB).
Ubos sa maong polisiya, kutob lamang sa napulo ka mga pasahero ang gitugotan nga magbarog sulod sa MPUJ aron masiguro ang kaluwasan og kaharuhay sa mga sumasakay.
Kon molapas na sa maong gidaghanon mahimo na kining dakpon.
Matod ni Hyll Retuya, pangulo sa Team, nga bisan kon ang silingang mga local government unit (LGU) wala pa naghimo sa susama, sa ilang bahin ila nang gipatuman ang maong polisiya aron pagdisiplina sa mga drayber ug aron paghatag kanila og leksyon nga dili lang ang kita ang ilang palabihon kon dili ang kaayuhan sab sa ilang mga pasahero.
Sa milabay’ng mga katuigan, ang talan-awon sa naghuot nga mga MPUJ diin ang mga pasahero halos nagbitay na lang, nahimong kumon na nga praktis sa mga drayber nga wala maghunahuna sa ilang pasahero.
Ang ngalan mismo, “Anti-Sardinas,” hingpit nga naghulagway sa mga pasahero nga daw murag sardinas nga gidasok sa lata.
Ang desisyon sa Team nga pahugtan ang pag-inspeksyon sa mga PUJ ug moisyu og Temporary Operator’s Permit (TOPs) sa mga makalapas usa ka lig-on nga timaan nga seryoso sila niini nga polisiya.
Pinaagi sa pagtakda og klaro nga limitasyon nga 10 ka nagtindog nga pasahero, ang ahensiya naghatag og konkreto nga sumbanan nga kinahanglang sundon sa mga drayber ug konduktor.
Kini nga hugot nga pagpatuman dili lang usa ka lokal nga paningkamot, nahiuyon sab kini sa nasudnong mandato sa LTFRB ug sa mga tumong sa Public Utility Vehicle Modernization Program (PUVMP).
Giawhag ang publiko nga i-report ang mga overloaded nga MPUJ pinaagi sa Facebook page sa Team.
Ang Team adunay napulo ka enforcers nga gihatagan og pagtugot sa Land Transportation Office sa pag-isyu og Temporary Operator’s Permit (TOPs) niadtong mga malapason.
Sukad sa pagsugod sa hugot nga pagpatuman sa maong polisiya sa Mandaue, usa na ka drayber sa MPUJ ang nahatagan og TOP gumikan sa sobra kadaghan nga nagbarog nga mga pasahero.