Ang pangulo sa Department of Transportation (DOTr) nga si Secretary Vince Dizon nipirma og kamanduan niadtong Martes, Mayo 6, 2025, aron pag-abli pag-usab sa mga aplikasyon alang sa PUV consolidation subay sa Public Transport Modernization Program (PTMP) sa gobiyerno nga naila kaniadto nga PUV Modernization Program (PUVMP).
Subay sa Department Order (DO) No. 2025-009, ang mga public utility jeepney (PUJ) ug UV Express (UVE) operators nga kanhi naghupot og mga provisional authority (PAs) apan napakyas sa pagkonsolida, apil na kadtong adunay mga unit nga gikumpirma sa Land Transportation Franchising and Regulatory Board (LTFRB) ug rehistrado sa Land Transportation Office (LTO) gikan sa 2023 ngadto sa 2024, ingon man kadtong adunay pending nga mosyon, mahimo’ng mo-apply sa PUV consolidation program.
Gilatid sab sa DO ang pag-isyu sa mga PAs alang sa unconsolidated nga operators.
Ubos sa mando, ang unconsolidated PUJs ug UVEs mahimong moapil sa kasamtangan nga consolidated Transport Service Entities (TSEs) sa mga rota nga adunay 60 porsiyento o mas taas nga consolidation, o magporma og bag-ong TSEs sa mga lugar nga ubos sa 60 porsiyento nga consolidation, basta lang aduna silay awtoridad kaniadto sa pag-operate sa maong mga rota.
Ang PUVMP gisugdan niadtong 2017 sa panahon ni kanhi Presidente Rodrigo Duterte.
Ang tumong sa maong programa nga ilisan ang mga jeep de pasaheroan nga nagdagan sulod na sa 15 ka tuig ug moderno, environment-friendly ug mas luwas nga mga sakyanan nga Euro 4 compliant.
Apan nasulbad ba sa gobiyerno ang problema sa transportasyon? Mao ni dakong pangutana.
Daghan’g mga pasahero nga nagbagulbol kay na-late sa trabaho kay dugay nakasakay tungod sa kakuwang sa sakyanan tungod kay gipang-phase out ang mga karaan nga jeepney, samtang ang gidaghanon sa mga modern jeepney nga gipanghulip niini gamay ra.
Buot ipasabot dili matubag sa mga modern jeepney ang panginahanglan sa mga pasahero sa transportasyon.
Makita nato karon nga panahon sa rush hour, daghan sa mga pasahero nga mag-agwanta na lang bisan magbarog, magsinardinas sulod sa modern jeepney aron lang makapauli sa ilang tagsatagsa ka panimalay.
Tungod niini, ubay-ubay sa mga jeep de pasaheroan ang gipanghatagan og provisional authority sa Land Transportation Franchising and Regulatory Board kun LTFRB aron makabalik og biyahe sa ilang naandan nga rota.