Karon’g adlawa, Abril 9, saulogon ang ika-83 nga anibersaryo sa Araw ng Kagitingan sa tibuok nasod.
Dinhi sa Siyudad sa Sugbo, adunay programa nga ipahigayon sa Cebu Veterans Memorial sa Plaza Independencia isip pagpasidungog sa kaisog ug patriyotismo sa mga Sugbuanon nga mihatag sa ilang kinabuhi alang sa kagawasan sa nasod.
Ang Araw ng Kagitingan usa ka nasudnong holiday nga gipahinungod sa kaisog ug sakripisyo sa mga sundalong Pilipino ug Amerikano sa panahon sa Second World War.
Kini naghandom sa pagkapukan sa Bataan sa mga tropang Hapon sa panahon sa ikaduhang gubat sa kalibutan.
Didto sa kaulohan, adunay kalihukan nga pagahimuon sa alas 8 sa buntag sa Abril 9 sa Mount Samat National Shrine sa Pilar, Bataan.
Si Presidente Ferdinand Marcos Jr., ang gikatakda’ng mangulo sa mga kalihukan lakip ang wreath-laying ceremony sa Dambana ng Kagitingan aron pagpasidungog sa mga Pilipino ug Amerikanong beterano sa Second World War.
Si Marcos mohatag usab ug pakigpulong nga nagpamatuod sa pasalig sa gobiyerno sa kaayohan sa mga beterano nga Pilipino.
Gawas niini, ang Faces of Valor Historical Exhibit ipahigayon usab sa University of Santo Tomas nga bukas alang sa publiko gikan sa Abril 21 hangtod 30, 2025.
Sa laing bahin, ang mga empleyado sa pribadong sektor nga motrabaho karon’g adlawa makadawat og 200 porsiyento sa ilang inadlaw nga sweldo sa unang walo ka oras.
Kon ang trabahante motrabaho og sobra sa walo ka oras, makadawat siya ug dugang nga 30 porsiyento sa iyang hourly rate.
Kadtong dili mo-report sa trabaho makadawat gihapon sa ilang suweldo basta ang empleyado motrabaho o anaa sa leave of absence sa adlaw sa dili pa ang regular holiday.
Niining mao’ng adlaw, gilauman usab nga modagsa ang mga tawo sa mall o sa ubang suroyanan sama sa park o baybayon uban sa ilang pamilya aron mag-shopping, mangaon ug mo-relax, sanglit walay klase og trabaho sa gobiyerno ingon man sa pribado’ng sektor, gawas lang niadtong mga kompanya nga adunay humanon nga trabaho nga nagkinahanglan nga mo-overtime ang ilang mga trabahante.
Ma-busy na usab ang kapulisan sa paghatag og seguridad sa mga tawo nga manuroy subay sa ilang police visibility nga programa.
Hinaut nga ang tawo dili magsalig sa kapulisan ug sila mismo maoy mag-amping ug magbantay sa ilang mga butang aron dili mabiktima sa mga mangunguot.