Ang Plaza Sugbo atubangan sa Cebu City Hall niadtong Huwebes sa buntag, Hunyo 26, 2025, napuno sa paglaom ug bag-ong sinugdanan samtang sila si Mayor Nestor Archival ug Vice Mayor-elect Tomas Osmeña nanumpa sa ilang katungdanan upat ka adlaw sa dili pa sila opisyal nga molingkod sa Hunyo 30.
Atol sa maong seremonya, nanumpa sab ang mga Councilor-elect sa Bando Osmeña Pundok Kauswagan (BOPK).
Kini naghatag og direksyon alang sa umaabot nga administrasyon: panaghiusa, kolaborasyon, ug walay hunong nga pagtutok sa pagtukod pag-usab sa Siyudad sa Sugbo aron mabalik ang kanhiay nga kahimtang niini.
Ang inagurasyon nga pakigpulong ni Mayor Archival nagpakita sa usa ka kusganong panawagan pag-awhag sa tanang Sugboanon nga aktibong mosalmot sa ambisyoso nga mga plano sa iyang administrasyon.
Ang iyang pagtandi sa usa ka proyekto sa konstruksyon, hingpit nga naghulagway sa iyang panan-awon: Sama sa bisan unsang construction project, walay usa ka trabahante ang makatukod nga mag-inusara. Nagkinahanglan kini og mga inhenyero, mga arkitekto, panday, electrician, ug mga mamumuo nga magtinabangay aron makompleto ang panan-awon.
Lakip sa labing dinalian nga mga isyu sa agenda ni Archival mao ang duha ka dugay nang problema nga giatubang sa siyudad: ang Cebu City Medical Center (CCMC) ug ang Pasil Fish Market.
Tingali mas ambisyoso pa ang panaad ni Archival nga humanon ang dugay nang nalangan nga CCMC sulod sa usa ka tuig.
Ang kamatuoran nga kapin sa P1 bilyon na ang nagasto sa maong proyekto apan tulo pa lang sa napulo ka andana ang nagamit.
Ang plano sa mayor nga mopahigayon og construction audit sulod sa tulo ka bulan human sa paglingkod sa katungdanan, sundan sa agresibo nga usa ka tuig nga timeline alang sa pagkompleto sa proyekto.
Ang iyang lig-ong saad, kauban si Vice Mayor-elect Osmeña, maghatag og benepisyo sa pag-atiman sa panglawas ug hospitalisasyon sa tanang konstituwente.
Laing agenda ni Archival mao ang pagsulbad sa dili maayong kondisyon sa Pasil Fish Market, gikan sa wala mahuman nga konstruksyon ug nagtulo nga atop niini ngadto sa hugaw nga kahimtang nga dugay nang giatubang sa mga tindera og mga customer, nagkinahanglan og usa ka dakong pagtagad.
Ang iyang bag-o nga pagbisita sa merkado, tungod sa hangyo sa mga tindera, nagpakita sa usa ka praktikal nga pamaagi nga nagsaad og konkretong resulta imbes nga mga saad lamang.