Editoryal: Away sa mga Duterte, Marcos nagpakuyaw

EDITORYAL
EDITORYAL

Grabe ang sinukliay og mahait nga mga pulong nila ni Presidente Ferdinand Marcos Jr. ug kanhi Presidente Rodrigo Duterte.

Gihulagway ni Duterte si Marcos nga adik ug bangag samtang ang Presidente nihimakak niini ug nihulagway sa pamahayag ni Duterte nga resulta sa iyang paggamit og fentanyl, usa ka pain killer nga makaadik sab.

Kon tan-awon og maayo ang pagdako sa away sa duha, kini nagsugod sa politika ra gihapon. Kay ang kanhi Presidente wa man nakauyon kang Marcos dihang nidagan kini kay alang niya huyang ang pagkatawo. Wa tuod niya nganli, apan matod niya nga dunay kandidato pagka presidente nga adik.

Karon klaro na kaayo nga ang iyang gipasabot niadto mao si Marcos.

Sa sugod pa lang, huyang na ang pundasyon sa Unity Team sa mga Marcos ug Duterte kon ang gipanulti sa kanhi Presidente ang basehan. Nagkadugay, nagkadaku na ang liki. Karon, klaro na ang badlis sa politika human sa buwag nga mga rally niadtong Dominggo sa Mindanao ug Luzon.

Ang labing uwahi nga gipahibawo ni Duterte mao ang pagtigom og signatures alang sa pagbuwag sa Mindanao gikan sa Pilipinas.

Kini nga pagpangisog sa kanhi Presidente nahaum sa pag-usab sa baruganan sa Dept. of Justice (DOJ) sa pagtugot sa pagsulod sa International Criminal Court (ICC) dinhi sa nasod sa pag-imbestigar sa extra judicial killings sa nasod panahon sa iyang administrasyon.

Usa kini ka pag-usab sa baruganan sa administrasyon karon nga kanhi supak niini tungod kay dunay functional nga justice system ang nasod.

Ning pag-usab sa baruganan sa administrasyon, wa kini makapahimutang sa kanhi Presidente tungod kay posible siyang masikop ug dad-on sa abroad alang sa usa ka husay.

Kon wa pa lang unta mausab ang baruganan sa administrasyon, hayan di ingon niini ang pag-atake ug panaway ni Duterte kang Marcos. Napun-an pa sa people’s initiative nga isyo.

Kining away sa mga Marcos ug Duterte nagbutang sa nasod sa kahuyang ug kakuyaw.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph