Editoryal: Away sa mga Marcos, Duterte modaku pa

EDITORYAL
EDITORYAL

Ang panagbayluay og mahait nga mga pulong tali sa mga Duterte ug ni Presidente Ferdinand Marcos Jr. opening salvo pa lang kadto sa nagdaku nga liki sa relasyon tali sa duha ka dagkong mga pamilya sa politika.

Ning uwahi nga pamasangil ni Arturo Lascañas, iya nang gilambigit si Bise Presidente Sara Duterte sa mga extra judicial killing sa Dakbayan sa Davao pinaagi sa Oplan Tokhang (Toktok Hangyo), diin giingon nga dagiton ang mga biktima, patyon dayon gipanglubong sa Laud Quarry sa Davao.

Siya nipasangil nga kini ang mando sa Bise Presidente dihang siya mayor pa sa Davao kaniadto kay nabalaka kini sa mga pangutana sa media sa mga kaso sa pagpamusil sa siyudad.

Ang Bise Presidente sa iyang video message nanghimakak sa pasangil. Matod niya gihimo kini karon nga siya bise presidente na.

Kon madayon ang pagtaral sa International Criminal Court (ICC) kang kanhi Presidente Rodrigo Duterte, hayan maangin ang Bise Presidente ning uwahi nga alegasyon ni Lascañas.

Nialegar si Lascañas nga naa sa mga 10,000 ang gipapatay sa kanhi Presidente sa iyang war on drugs sukad nahimo siya’ng mayor sa Davao City. Apan sa samang higayon, iya usab nga gipasanginlan si kanhi Presidente Duterte nga maoy hari sa drugs sa Mindanao kay maoy nagpadagan og shabu laboratory. Maorag contradictory ang pamahayag ni Lascañas tungod kay unsaon sa pagkahimong drug lord sa usa ka anti drug crusader nga daghan og gipapatay? Kay daghan siya og kontra sa pagpadagan og illegal drugs?

Katuohan ba sab nga dunay 3,000 nga gipamatay ug gipanglubong sa Laud Quarry? Apan ning labing uwahi nga kalambuan, hayan mabitad ang Bise Presidente ning kaso sa iyang amahan.

Kon dayunon man sa administrasyong Marcos ang pagpasulod sa ICC ug ning labing uwahi nga pasangil ni Lascañas batok sa Bise Presidente, hayan mobadlis na si VP Sara tali sa ilang relasyon sa Presidente.

Posible nga di lang moliki, mabuak na ang talandugon nga pulitikanhong relasyon nila.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph