Ang insidente nga nahitabo sa Guindulman, Bohol, diin usa ka polis nga si Police Corporal Marcelo Olaer ang gidakop sa iyang kaugalingong mga kauban tungod sa iyang pagpanghagis og usa ka langyaw, nakamugna og kabalaka sa mga residente mahitungod sa ilang kaluwasan.
Kini usa ka makapabalaka nga pagpadayag sa usa ka nagpadayong problema sa atong kapulisan: ang isyu sa mga indibiduwal nga anaa sa serbisyo apan walay disiplina sa kaugalingon, ilabi na kon makainom.
Dili ikalimod nga dako ang responsibilidad sa mga polis sa atong katilingban. Sila ang atong gisaligan nga mopatuman sa balaod ug mopanalipod sa katawhan. Apan unsaon na lang kon ang mismong tigpatuman sa balaod maoy maglapas niini?
Ang kaso ni Olaer diin siya nanghulga, namalikas, nanukmod, ug nanumbag sa usa ka American national atubangan sa iyang asawa ug bata, usa ka pag-abuso sa iyang gahom ug posisyon.
Wala pa makontento, gipatiran pa gyud ang motorsiklo sa maong langyaw kay iyang ipadaplin. Ang nakaapan kay nahitabo kini atubangan sa publiko nga nagpakita sa iyang hingpit nga pagkawala sa pagpugong sa kaugalingon.
Matod ni Police Lieutenant Colonel Norman Nuez, ang information officer sa Bohol Police Provincial Office, nga buotan si Olaer kon dili makainom apan mausab ang batasan niini kon mahubog.
Apan ang pagkahubog dili usa ka lisensya sa paghimo og krimen o pagpasakit sa uban, labi na sa usa ka tawo nga nagsul-ob og uniporme. Ang usa ka polis kinahanglan nga magbaton og disiplina sa tanang panahon, hubog man o dili.
Ang ilang propesyon nagkinahanglan og taas nga sumbanan sa pamatasan ug integridad ug dili kini mahimong ikumpromiso tungod sa personal nga bisyo.
Dugang ni Nuez nga dili kini ang unang higayon nga nalambigit si Olaer sa susamang insidente.
Niadtong 2020, gipahamtangan na siya og silot nga pagkasuspenso ug pagka-demote sa iyang ranggo gikan sa Police Master Sergeant ngadto sa Corporal tungod sa pagpabuto sa iyang armas samtang hubog.
Kining maong kamatuoran nagpakita nga ang sistema sa pagdisiplina sa mga polis aduna pay depekto. Ngano nga ang usa ka tawo nga nakahimo na og susamang kalapasan ang gitugotan gihapon nga magpadayon sa serbisyo?
Ang pagbalik-balik sa iyang sayop nagpasabot nga ang miaging silot dili paigo. Ang pag-atubang ni Olaer og kasong administratiba ug ang pagdisarma kaniya maoy mga tukmang lakang.
Apan kinahanglan nga sigurohon sa mga awtoridad nga mahatagan og seryoso nga pagtagad kining kasoha ug nga ang resulta dili lang usa ka temporaryo nga solusyon.
Panahon na nga atong repasuhon ang sistema sa pagkuha ug pagdisiplina sa mga polis.
Kinahanglan nga mas hugot ang pag-screen sa mga aplikante ug angay nga adunay mas epektibo nga mekanismo sa pag-monitor sa pamatasan sa mga nagserbisyo na nga mga polis.
Ang publiko naglaom nga ang mga polis mahimong ehemplo sa kalinaw ug kahusay.
Apan kon ang mismong mga polis maoy momugna og kagubot, unsaon na lang nato pagsalig kanila?
Ang kaso ni Olaer usa ka seryoso nga pahinumdom nga dili mahimong ibaliwala ang mga badlungong miyembro sa serbisyo.
Ang matag polis kinahanglan nga manubag sa ilang mga gihimo ug ang serbisyo mismo kinahanglan nga walay kahadlok nga mopalagpot sa mga dili angay niini.
Ang kaluwasan sa publiko maoy kanunay nga unahon.