Editoryal: ‘Badlungon’ milihok na

Editoryal: ‘Badlungon’ milihok na
File photo

Nipasidaan na ang kapulisan nga sa mga buwan sa Pasko ug Sinulog, ang ginagmay nga kriminalidad mosaka tungod sa pagpahimulos sa dautang mga elemento sa kadaghan sa mga tawo sa kapistahan.

Ug napamatud-an na ang pasidaan sa kapulisan tungod sa daghan nang reklamo nga nabiktima sa pagpanguot sa dalan Colon, pagpanglabni ug pagsiaw sa modus sa pagpangilad nga gitawag og budol-budol.

Giangkon sa kapulisan sa dakbayan sa Sugbo nga nakadawat sila og reports nga dunay mga nabiktima sa budol-budol sa dapit sa Basilica Minore del Santo Nino nga nagpa blotter sa barangay.

Hinuon, matod ni Police Lieutenant Colonel Janette Rafter, deputy city director for operations sa Cebu City Police Office (CCPO), nailhan ug gipanid-an nila ang usa ka personalidad nga gituohan nga responsabli sa modus nga pangilad sa mga manimbahay sa Basilica.

Gitinguha nila nga madakpan sa labing dali nga panahon aron dili makabiktima pa sa dali rang madala o mailad kon pakit-on og kwarta nga kunohay ibilin kanila.

Giawhag sa kapulisan ang publiko labi na sa mga bisita sa dakbayan nga magmatngon ug dili magpadala sa pasalig sa mga tawo nga maayong manulti ug dili nimo kaila.

Gipasalig sa opisyal sa kapulisan nga dunay gitaha­san nga mga polis nga naniid sa palibot aron pagsikop sa mga kriminal nga manggawas ning panahuna.

Dugang awhag sa CCPO sa publiko nga dili magdala og mahalong mga butang ug dako’ng kantidad sa salapi ug alerto kanunay sa pagpanuroy sa mga kalingawan ug bisan sa pagtambong sa mga relihiyusong kalihukan.

Nasayran nga kapin sa 3,000 ka mga polis ang gipangkatag karon sa dakbayan alang sa seguridad sa mga kalihukan sa kapistahan ni Sr. Sto. Niño.

Apan ang kapulisan ug ubang units sa otoridad nagkinahanglan sa suporta sa komunidad aron mas magmalampuson sa pagserbisyo sa pagpa­tunhay sa kahusay ug kalinaw.

Sa paglakaw taliwa sa daghang mga tawo, ibutang sa hunahuna ang presensiya sa mga badlu­ngon nga nanaglihok karon. Kanunay nga alerto.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph